主页 > S生活化 >愿意同你露营度蜜月的女人，一定娶得过！ >
愿意同你露营度蜜月的女人，一定娶得过！
2020-07-10
旅行度蜜月，一世人一次喎，老婆实係话要求豪一次去欧洲、马代住靓酒店，再唔係，退而求其次最起码都近近哋去日本温泉或者苏梅resort做皇帝皇后啦。不过最近听到我的摄影师朋友Francis So话，刚刚带咗老婆去瑞士 露营 度蜜月……
结婚同行山一样，都係呃呃凼凼、互相迁就。听到老友带老婆去 瑞士露营 度蜜月，我当堂吓一跳，然后得啖笑。我都係行多两步就会攰嘅一名港女，深明女人出门有几咁多嘢要準备，出街热啲要用芭蕉扇，入冷气房见冻又要披肩，老友你居然够胆死叫老婆Angel同你揹住十几公斤的背嚢行山露营，仲要畀晒啲位你摆摄影器材？！
虽然瑞士绝景好靓好靓，但行足咁多日，拎住行李上山落山，咩仙景都睇厌啦，唔怕行行下闹大交咩？点知平日Cool 爆的老友突然露出搏打的甜笑，「可以遇到个一齐癫的女人，愿意一齐分担旅途上的重量，一定要好好珍惜。佢一定娶得过！」
我老友Francis亦不例外，同老婆倾蜜月行程的时候，胆粗粗提出：「不如去瑞士啦，上次我影唔到金三角，好失望，蜜月野营影日出……得唔得啊？」原本以为要花好多口水，点知老婆二话不说就答应。
虽则口爽爽，但是考虑到在接近3千米山上野营温差大，一到夜晚又大风又乾燥；对港女来讲，沖凉又是另一个大问题；最恶顶的是每人揹住十几公斤上山，拖喼拖死，孭背囊孭死，女友脾气差少少都随时触及临界点，小则黑面大则闹交，最惊爆句：「最多咪离婚！」
为咗令老婆留下浪漫回忆，同时兼满足自己拍摄私心，死佬Francis 怯住咁準备今次另类蜜月旅行，拣最简单又睇到最靓风景的行山路径同野营地点，最后决定在五湖健行径、巴哈阿尔普湖（Bachalpsee）落脚，每日步行不超过个半钟，沿途可以睇住靓爆雪山同湖景。不过女人仔拎住咁重装备，又点会无怨言？
阿嫂Angel 不时忍唔住问：「到未啊？」、「仲有几耐呀？」呢个时候，做老公就要醒目，绝对唔可以太诚实：「见到啦，嗰度就係！」、「好快到！」（其实仲有好远）。去个旅行，全程要睇实老婆大人面色做人， 老友话其实苦中有甜。佢自己咪一样有灰鸠的时候，Angel 反而调转头鼓励返老公：「唔紧要啦，唔係好辛苦啫！」常言道：「打牌行山见真章。」最攰的时候最难掩真性情、坏脾气，搵到个咁体贴嘅老婆，老友你真係几生修到啦！
或者你会话，见到以上的靓景，用肉眼睇都已经好明信片一样靓，极爱打卡的港女实兴奋到晕，再辛苦都唔紧要啦。少年你太年轻了，遇着摄影发烧友如Francis，见到靓景必定大师上身，影极都唔满意试完又试，仲要影time lapse 实有排影，兼夹阿嫂Angel 係激罕有、唔太锺意影相嘅港女，可以点做？
Francis 又借啲意盛讚老婆係个超有耐性嘅贤妻，当佢一路行下影下又拍下time lapse，阿嫂从无埋怨，安坐一边做望夫石，有时反而仲帮个衰公影劲chok 嘅行山相；Francis 都识做，等老婆瞓咗先慢慢影星轨、日出，行山行到每日瞓得唔够6个钟，佢都自觉疯狂，但阿嫂更加唔话得啰！
睇返Francis 呢辑蜜月旅行相，我发觉佢两个嘅合照无乜几多张，反而明信片一样嘅靓相就大把，畀外家知道咁样虐待刚嫁出去嘅女唔怕咩？跟团或者住resort 歎下咪仲舒服？Francis 忽然情圣上身抛低一句：「可以同老婆一齐在绝景下留倩影，老咗一定唔会后悔。」计我话：有个能互相支持、互相迁就跟你行山野营嘅老婆，老友，你执到啦！
话说回头，Angel 同Francis 嘅Honeymoon 又点只野营嘅3日，佢哋花咗20日游览维也纳同瑞士，在瑞士分别Zermatt 和Grindelwald 共野营了3天，行程唔太chur，中间仲有住靓酒店同玩阿尔卑斯山滑梯等等游客嘢，凼下老婆无得投诉啦！
瑞士露营蜜月路线
DAY1 由小镇Zermatt乘火车至Rotenboden，再行20分钟至Riffelsee湖野营
DAY2 健行1.5小时至Riffelberg乘火车站回Zermatt补给，再坐缆车上Blauherd步行25分钟至Stellisee湖野营
DAY3 （相隔4日）由小镇Grindelwald乘登山缆车至First，沿Eiger Ultra Trail健行约1个半小时至Bachalpsee湖野营留意：
瑞士7至9月的天气最适合野营； 瑞士并无法例禁止野营，不过部分地方如国家公园、野生动物保护区、森林、河谷等除外，所以出发前记住check清楚。
上一篇：愿意再次相信爱情的美好！11张童趣插画看情侣暖心互动
下一篇：愿意向孩子示弱，可以把孩子鼓励成得意小帮手
